Scott Bessent, sekretari i Thesarit i SHBA-së u shpreh se nuk ishte i shqetësuar “për momentin” për dyqanet amerikane që mund t’iu mbarojnë artikujt për shkak të tarifave të presidentit Donald Trump.
I pyetur gjatë një interviste me “Fox News” nëse ishte i shqetësuar për raportet e rafteve të zbrazëta, Bessent u përgjigj: “Jo për momentin”.
“Kemi disa shitës me pakicë të shkëlqyer. Supozoj se ata kanë porositur paraprakisht” u shpreh Bessent.
Presidenti i SHBA-së ka prezantuar një tarifë bazë prej 10 përqind kundër shumicës së vendeve, dhe një taksë shumë më të lartë që arrin në 145 për qind për mallrat që vijnë nga Kina.
Shtëpia e Bardhë gjithashtu prezantoi disa tarifa specifike sektoriale prej 25 për qind, dhe ka kërcënuar të rivendosë masa më të larta për dhjetëra partnerë tregtarë nëse ata nuk arrijnë një marrëveshje për të ulur barrierat tregtare me Shtetet e Bashkuara.
