Aldo Bare, ish-kreu i bandës famëkeqe të Lushnjës kërkon të ndryshojë dënimin me ‘burg përjetë’. Ai ka dorëzuar në Gjykatën Kushtetuese kërkesën për prishjen e vendimeve të tre shkallëve të gjyqësorit, të cilat i dhanë masën maksimale të dënimit. Më 31 janar, Gjykata Kushtetuese pritet të shqyrtoje kërkesën e Bares.
Ai kërkon të shfuqizohen vendimet e Gjykatës së Shkallës së Parë për Krimet e Rënda, asaj të Apelit për Krimet e Rënda dhe Gjykatës së Lartë të cilat konfirmuan dënimet njëra pas tjetrës. Sipas avokatëve të Bares ato vendime janë antikushtetuese dhe si të tilla duhet të shfuqizohen.
Aldo Bare i njohur ndryshe si Alfred Shkurti u ekstradua nga Turqia ne vitin 2009. Prokuroria e Krimeve te Renda e akuzonte për krijimin e organizatës kriminale, 15 vrasje, për rrëmbim personi, shkatërrim prone si dhe trafik të drogës.
Kërkesa e tij vjen pak muaj pas lirimit nga burgu të Lulzim Berishës, kreut te ish –bandës së Durrësit, i cili ishte dënuar me burg përjetë, por u dënua me pas me 25 vjet pasi Gjykata e Larte e prishi vendimin e parë.
