Pas Lëvizjes Socialiste për Integrim, edhe Partia Republikane ka dorëzuar kërkesën në KQZ për tu regjistruar në zgjedhjet vendore të 13 tetorit. Kërkesa e firmosur nga kryetari, Fatmir Mediu mban datën 3 gusht por është protokolluar ditën e sotme.
Sot është afati i fundit për partitë politike për tu regjistruar në zgjedhjet e 13 tetorit. Kjo datë është dekretuar nga Presidenti Meta dhe sipas tij është e vetmja datë e ligjshme për mbajtjen e zgjedhjeve vendore. Nga ana tjetër KQZ ende nuk ka nisur punën për organizimin e këtyre zgjedhjeve. Mbledhja ku parashikohej të shqyrtohej kërkesa e partive të opozitës për 13 tetorin dështoi pasi anëtarët socialistë nuk u paraqitën kështu që nuk u plotësua kuorumi i nevojshëm. Mazhoranca gjithashtu nuk e njeh 13 tetorin si datë zgjedhjesh dhe thekson se zgjedhjet mbaruan më 30 qershor dhe rezultati i tyre tashmë është bërë publik. Ndërkaq Partia Demokratike që udhëheq frontin opozitar ka ripërsëritur kushtin e saj se me Edi Ramën kryeministër ata nuk hyjnë në zgjedhje.
PD ende nuk ka paraqitur kërkesë në KQZ për tu regjistruar në zgjedhjet e 13 tetorit. Nëse situata do të mbështet e njëjtë atëherë në zgjedhjet e 13 tetorit nuk do të jenë të regjistruara dy partitë më të mëdha në vend. Mos regjistrimi i PD mund të sjellë gjithashtu një përçarje në radhët e opozitës.
Në lidhje me këtë fakt Sekretari i Përgjithshëm i LSI, Endrit Braimllari nuk dha një përgjigje direkte por tha se “Ajo ç’ka është e rëndësishme është që data 13 tetor është ditë zgjedhjesh e ligjshme në vend për zgjedhjet për pushtetin lokal dhe është e respektueshme nga të gjithë”. /Opinion.al
