Lajm i madh, futbolli është shumë pranë ndryshimit. Fuqitë më të mëdha drejtuese nuk kanë aspak turp apo ndrojtje që të ndryshojnë herë pas here rregullat e lojës, sikurse konkretisht kanë bërë me teknologjinë “goalline” (topin që sinjalizon kur kalon vijën fatale), apo dhe me sprayn magjik.
Por tani është përgatitur një ndryshim i madh, aq sa për të vënë në rrezik ekzistencën tonë. Në të vërtetë jo dhe aq ekzistencial, por mjaftueshëm i madh për të revolucionarizuar përfundimisht mënyrën e fillimit të lojës, atë momentin e prekjes së topit të parë.
Bordi i Federatës Ndërkombëtare të Futbollit ka njoftuar se tashmë topi mund të lëvizë në çdo drejtim gjatë nisjes së topit të parë nga mesi i fushës, i njohur si momenti i “kickoff”, ndryshe nga më parë kur ishte e detyrueshme që takimi i parë i topit të bëhej në drejtim të gjysmëfushës kundërshtare.
Do të thotë që në të ardhmen mund të shohim dhe të jemi dëshmitarë të nisjeve më të çuditshme të lojës, sikurse Sampdoria bëri në janar të sezonit të kaluar në ndeshjen ndaj Lazios, kur i gjithë ekipi asaj kohe i drejtuar nga Mihajlovic, është rreshtuar në vijën e mesit të fushës, me përjashtim të portierit. Mund të shohim gjithashtu edhe ekipe që të nisin lojën me topin e prekur nga vetëm një sulmues dhe jo dy të tillë.
Askush nuk e di, por është e sigurtë që do të jetë shumë interesant.
Por ndryshimet nuk përfundojnë këtu. Ka një listë të plotë me ndryshime që përfshijnë në zbutjen e rregullave në lidhje me ndërhyrjet fatale për evitimin e rasteve për shënim. Gjyqtari mund të mbajë shënim emrin e futbollistit, në vend që ta penalizojë menjëherë me karton të kuq, nëse ndërhyrja është aksidentale, ose nuk është aq e rrezikshme. Njëkohësisht tashmë shtohet pushteti i gjyqtarit, i cili mund të largojë nga fusha futbollistët nëpërmjet skualifikimit, ende pa filluar loja.
Në favor të futbollistëve është fakti që tashmë ata do të mund të marrin ndihmën e parë që në fushë, ndryshe nga më parë kur ishin të detyruar të dilnin më parë nga fusha, pastaj të trajtoheshin.
“IFAB” ka miratuar gjithashtu një projekt pilot prej dy vitesh mbi përdorimin e teknologjisë video, që do të asistojë gjyqtarët në katër raste: nëse është realizuar ose jo një gol i pretenduar; përcaktimin e kartonave të kuq, rastet për penallti, si dhe gabimi në identifikim.
