Prej më shuymnë se dy javësh, pas humbjes së vajzës 13-vjeçare, familja Smajli është shpërngulur nga fshati Berishë i Pukës dhe është vendosur në ambjentet e Qendrës Spitalor Universitare, ku tashmë po trajtohen katër fëmijët e tjerë, dy prej të cilëve në gjendje të rëndë shëndetësore.
Në emisionin “Me zemër të hapur” në “Neës24”, babai i fëmijëve thotë se vajza dhe djali ndodhen në gjendje më të rëndë, ndërsa bën apel për ndihmë.
I ati i 13-vjeçares Lini Smajli tregon momentet e rënda kur vajza dha shpirt, si dhe telefonatën me mjekun e familjes. Ai thotë se sapo mjeku ka shkuar në banesë, ka kërkuar ndihmën e institucioneve dhe ka ardhur një helikopter për të transportuar edhe fëmijët e tjerë të sëmurë të familjes drejt Tiranës.
Humbja e vajzës e ka dërrmuar në shpirt, por thotë se rron me shpresë që të paktën të shpëtojë vajza tjetër, më e vogël që prej 14 ditësh ndodhet në reanimacionin e Pediatrisë në QSUT e prekur nga një pneumoni masive në anën e djathtë.
Nga kryefamiljari mësojmë se e gjithë familja Smajli ka braktisur shtëpinë në fshatin e thellë në Fushë Arrës dhe është transferuar momentalisht në pavijonet e QSUT ku veç vajzës 11-vjeçare mbahen të shtruar edhe 3 djemtë, që ndodhen në Shërbimin Infektiv për të rritur.
60-vjeçari shfaqet i përlotur teksa flet për dramën që ka pllakosur në familjen e tij të varfër, ku edhe e vetmja e ardhur nga ndihma ekonomike 5 mijë lekë në muaj i është ndërprerë që në janar ,pasi siç thotë edhe vetë e ka pasur të pamundur të shkojë në qytet për të bërë dokumentet për shkak të izolimit nga dëbora.
Për qeverinë ka vetëm një lutje, që ta ndihmojë në hallin e madh që i ka rënë.
Sipas spitalit “Nënë Tereza” shërbimi mjekësor i ofruar për 4 fëmijët e familjes Smajli ka qenë maksimal dhe nuk i ka munguar asnjë medikament.
