Kryetari i Kuvendit të Kosovës, Kadri Veseli tha se tani Kosova duhet të hyjë në zgjedhje të parakohshme dhe se partia e tij është gati për këtë.
Vendimi i ish-Kryeministrit për dorëheqje është vendim personal dhe si të tillë e kemi pranuar, pavarësisht që për këtë nuk kemi pasur asnjë njoftim ose konsultë paraprake. Tashmë, zgjedhjet e parakohshme janë të pashmangshme. Partia Demokratike e Kosovës është e gatshme për zgjedhje, kurdo që caktohen ato. Ajo që mund të diskutohet tash është vetëm koha kur ato duhet të mbahen. Për këtë, besoj se do të kemi konsulta edhe me partnerët e koalicionit të deritashëm dhe me parti të tjera politike, në pajtim me Kushtetutën dhe ligjet në fuqi”, tha Veseli në një konferencë për mediat ku nuk pranoi t’i bëheshin pyetje.
Ai siguroi qytetarët për sovranitetin dhe integritetin e Kosovës të cilën e cilësoi se interesi më i madh i përbashkët. Gjithashtu ai përmendi marrëdhëniet e forta me SHBA dhe nënvizoi se thirrja e Gjykatës Speciale për ish-luftëtarët e UÇK-së nuk duhet të shkaktojë pasiguri.
“Kosova qëndron fort afër me partnerët e vet perëndimorë, Shtetet e Bashkuara të Amerikës dhe Bashkimin Evropian. Mbi çdo interes individual dhe partiak – qëndron Kosova! Si PDK, falënderojmë dhe sigurojmë qytetarët për përkrahjen dhe besimin e qëndrueshëm e të përbashkët në interes të vendit tonë dhe vlerave tona perëndimore. I sigurojmë ata se do t’i kryejmë të gjitha përgjegjësitë tona për t’i dhënë vendit një Qeveri me mandat dhe legjitimet qytetar, sa më parë.
“Besimi ynë në drejtësinë dhe pastërtinë e luftës së Ushtrisë Çlirimtare të Kosovës është i palëkundur, ashtu si edhe bindja jonë se ushtarët e lirisë do të dalin faqebardhë edhe në fund të kësaj sfide”, tha Veseli.
Dorëheqja e Haradinajt për tu paraqitur në Gjykatën Speciale të Kosovës në Hagë i dha fund edhe koalicionit ndërmjet Partisë Demokratike, Aleancës për Ardhmërinë e Kosovës dhe Nismës Socialdemokrate që garuan së bashku ne zgjedhjet e përgjithshme të 11 qershorit të vitit 2017. /Opinion.al
