Sekretari amerikan i Mbrojtjes, Lloyd Austin, mbërriti të premten në qytetin izraelit të Tel Avivit, për t’u takuar me udhëheqës të lartë të qeverisë dhe për të parë nga afër disa nga armët dhe ndihmën që Uashingtoni i dorëzoi me shpejtësi Izraelit në javën e parë të luftës së tij me grupin militant Hamas.
Austin është zyrtari i dytë i nivelit të lartë amerikan që viziton Izraelin në dy ditë. Udhëtimi i tij i shpejtë nga Brukseli, ku ai po merrte pjesë në një takim të ministrave të mbrojtjes të NATO-s, vjen një ditë pasi Sekretari i Shtetit Antony Blinken mbërriti në rajon të enjten. Blinken po vazhdon diplomacinë nw Lindjen e Mesme, duke kërkuar të shmangë një konflikt të zgjeruar rajonal.
Austin pritet të takohet me kryeministrin Benjamin Netanyahu, Ministrin e Mbrojtjes Yoav Gallant dhe kabinetin izraelit të luftës.
Ardhja e tij vjen pasi ushtria izraelite udhëzoi qindra mijëra banorë në qytetin e Gazës që të evakuoheshin “për sigurinë dhe mbrojtjen e tyre”, përpara një ofensive tokësore të frikshme izraelite. Sundimtarët e Hamasit të Gazës u përgjigjën duke u bërë thirrje palestinezëve që të “qëndrojnë të palëkundur në shtëpitë tuaja dhe të qëndrojnë të patundur” kundër Izraelit.
