Pas takimit me ambasadorët e Delegacionit të BE, të vendeve anëtare dhe të Mbretërisë së Bashkuar të akredituar në Tiranë, presidenti Ilir Meta është takuar sot me kreun e Partisë Demokratike, Lulzim Basha.
Lajmi është konfirmuar nga presidenti, i cili thotë se takimi u mbajt në ambientet e Presidencës me kërkesë të tij.
Meta thotë se e ka siguruar Bashën se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit.
Po ashtu, ai ka kërkuar që opozita të vijojë punën në Këshillin Politik pa rënë pre e provokimeve. Ky takim vjen pas përpasjes së opozitës dhe mazhorancës pë ndryshimet kushtetuese.
Postim i Metës
Sapo përfundova një takim me kërkesën time me Kryetarin e Partisë Demokratike dhe liderin e Opozitës së Bashkuar z.Lulzim Basha.
E sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit.
E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi.
Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes.
