Presidenti i Partizani karikon të tijtë para përplasjes së madhe në kampionat, ndaj kampionëve korçarë. Sikurse dihet, nesër, në orën 17:00, në “Elbasan Arena”, të kuqtë do të sfidojnë Skënderbeun kryesues pas 8 javësh kampionat, me synimin për t’ia rrëmbyer këtë pozicion në mbyllje të fazës së parë.
Natyrisht, para lojtarëve, që janë të grumbulluar, kreu i 15 herë kampionëve të vendit do të ketë bërë edhe ndonjë premtim, për ndonjë premio, por për këtë nuk flitet në njoftimin për shtyp të klubit: “Gazment Demi ka takuar sot skuadrën, në prag të takimit të rëndësishëm ndaj Skënderbeut, në program të dielën, ora 17:00, në stadiumin “Elbasan Arena”. Në ambientet e hotel “ Vila Park”, ku aktualisht Partizani gjendet i grumbulluar, kreu i klubit ka zhvilluar një takim me të gjithë lojtarët dhe stafin drejtues.
Presidenti Demi dhe drejtuesit më të lartë të klubit për disa minuta janë njohur nga afër me gjendjen dhe atmosferën që po përjeton skuadra në prag të takimit më të rëndësishëm të kampionatit. Në përfundim, nuk kanë munguar edhe batutat e humori, ndërkohë që presidenti u ka uruar të tijve fitore.”
