Duke komentuar krijimin e një partie të re të djathtë, e cila mendohet se do të drejtohet nga ish-nënkryetari i Partisë Demokratike Astrit Patozi, Dashamir Shehi tha se është i mirëpritur nëse do të vendosë të jetë opozitar. Ai shtoi se partitë që regjistrohen ditën e fundit në zgjedhje e bëjnë për fasadë, sepse nëse do të kishin platforma reale do ta bënin këtë gjë më herët.
“Ne urojmë që kushdo që merr pjesë në betejën politike si opozitar është i mirëpritur, kush merr pjesë si fasadë nuk ka ndonjë vlerë. Uroj që çdo koleg, të bëhet në radhë të parë opozitar. Kjo është e rëndësishme. Kush kishte ide për të lëvizur, ka pasur kohën e mjaftueshme, sot po regjistrohen partitë në ditën e fundit”, tha Shehi.
Gjatë fjalës së tij, pas firmosje së marrëveshjes me Partinë Demokratike, Dashamir Shehi tha se pengimi i zgjedhjeve farsë do të bëhet me çdo formë.
“Fatmirësisht opozita është e larguar nga egoizmat e vogla parazgjedhore, në bazë të marrëveshjes është beteja që i kemi shpallur Rilindjes dhe Edi Ramës. Nga mosregjistrimi në zgjedhje fillon beteja. Me të gjitha mënyrat do t’i pengojmë zgjedhjet, nga deklarimet e sotme, duke mos regjistruar maksimumin e partive, duke bërë të mundur që qytetarët të mos shkojnë në zgjedhje, minimalisht duhet gjysma e qytetarëve të shkojnë në zgjedhje. Harku opozitar po zgjerohet çdo ditë. Ky është regjim, nuk është thjesht një grup njerëzish që qeverisin Shqipërinë, është oligarki e vogël”, u shpreh Shehi./Opinion.al
