Hapi i panegocieshëm për opozitën është largimi i Edi Ramës dhe dënimi i krimit elektoral. Kështu është shprehur sot Lulzim Basha, pas firmosjes së marrëveshjeve me partitë e koalicionit opozitar. Basha tha për gazetarët se qeveria tranzitore që do të krijohet do të sigurojë zgjedhjet e lira dhe të ndershme.
“Në orët dhe ditët në vijim, koalicioni do të zgjerohet për parti të tjera politike. Është i hapur për të ndërtuar bashkëpunim me gjithë grupet e shoqërisë, për t’i dhënë Shqipërisë të ardhmen Evropiane që meriton. Kjo fillon duke i dhënë fund krimit elektoral, angazhimi kryesor i koalicionit opozitar, që është mazhoranca e re morale dhe numerike e Shqipërisë, nuk do të pranojmë proces zgjedhor fals. Zgjedhje farsë nuk do të ketë, pa u ndëshkuar krimi elektoral”, tha Lulzim Basha.
Lulzim Basha u pyet edhe për partinë “Bindja Demokratike” me kryetar Astrit Patozin, që sot u regjistrua zyrtarisht në Gjykatën e Tiranës. Basha u përgjigj shkurt se nuk do të ketë opozitë false.
“Gjeneza e të keqes ku ndodhemi, janë zgjedhjet false të diktuara nga krimi. Nuk do të ketë zgjedhje false, parlament fals. Nuk do të ketë më opozitë false”, tha Lulzim Basha.
Partia Demokratike nënshkroi marrëveshjet me aleatët e saj, LSI, PR, PDK, PAA, LZHK, PDIU dhe PBDNJ, ku ndër të tjera, parashikohet krijimi i një fronti të përbashkët opozitar për ndalimin e zgjedhjeve të 30 qershorit/Opinion.al
