Në seancën e Parlamentit Europian, ku u miratua rezoluta e Knut Fleckenstein mbi raport – progresin e Shqipërisë gjatë vitit 2015, Komisioneri Johannes Hahn kërkoi finalizimin sa më shpejt të Reformës në Drejtësi. Hahn u shpreh se “partitë politike tani duhet të angazhohen në një dialog konstruktiv vendimtar dhe të finalizojnë Reformën e Drejtësisë. Ky është një detyrim tejet i vonuar i politikës, i cili është në interes të të gjithë qytetarëve”.
Ndërsa eurodeputeti, Knut Fleckenstein, tha se “finalizimi i reformës së gjyqësorit dhe fillimi i zbatimit të saj duhet të hapë rrugën për një rekomandim pozitiv të Komisionit Europian lidhur me negociatave të anëtarësimit të vendit në Bashkimin Europian dhe Parlamenti do japë mbështetjen e tij”.
Parlamenti Europian kërkon të shohë rezultate konkrete edhe në luftën kundër korrupsionit.
Kështu ministrja e Mbrojtjes e Hollandës, Jeanine Hennis – Plasschchaert u shpreh se “nevojitet një gjurmë provash solide për hetimet, ndjekjet penale dhe dënimet në luftën kundër krimit të organizuar dhe korrupsionit në të gjitha nivelet”.
Ndër të tjerë foli edhe eurodeputeti Ivan Jakovçiç. Ai tha se“dobësia e shtetit ligjor, korrupsioni dhe krimi i organizuar në Shqipëri janë kërcënim për Bashkimin Europian”.
Eurodeputetët e vunë theksin edhe tek zbatimi i ligjit të dekriminalizimit dhe reformën që nevojitet për të korrigjuar parregullsitë serioze të evidentuara nga OSBE/ODHIR në zgjedhjet lokale. /Tv Klan
