Presidenti Bujar Nishani ka kërkuar një hetim nga të huaj për parkun e liqenit dhe konkretisht për atë që e ka firmosur, Kryebashkiakun Erion Veliaj.
Lajmi është zyrtar i bërë publik në faqen e Presidencës ku ndër të tjera thuhet se Nishani gjatë një takimi me aktivistë është shprehur: është i nevojshëm konsolidimi i mekanizmave ligjorë dhe institucionalë për garantimin e të gjitha të drejtave tona. Kam kërkuar në mënyrë institucionale një hetim të pavarur e të paanshëm ndërkombëtar të ndërtimit në parkun e Liqenit artificial të Tiranës, në respekt dhe zbatim të Konventës së Aarhusit, nënshkruese e së cilës është edhe vendi ynë.
Aktivistët civilë i kanë shprehur shqetësim Nishanit për disa çështje si: papërputhshmëria e vendimeve arbitrare me Kushtetutën dhe ligjet në fuqi, moskonsultimi paraprak me ekspertë dhe me komunitetin për projekte apo ligje që bëhen në emër të të gjithë qytetarëve dhe që ndikojnë në jetën e përditshme duke u cenuar interesat dhe cilësinë e jetës, apo edhe arroganca e theksuar e pushtetarëve të zgjedhur, etj.
Aktivistët civilë paraqitën shqetësimin e veçantë për “betonizimin e lirisë, përveç betonizimit të parkut të Liqenit Artificial në Tiranë, si dhe për “fjalorin jashtë çdo etike që përdoret nga njerëzit e veshur me pushtet duke goditur përditë qytetarinë shqiptare”, duke i kërkuar Kreut të Shtetit si garant i Kushtetutës dhe unitetit të popullit, të përcjellë zërin dhe shqetësimet e tyre pranë institucioneve më të larta të Republikës, thuhet në njoftim.
