Gjykata e Durrësit ka lënë nën masën “arrest në burg” Xhemal Lokën, i cili akuzohet se ka çuar drejt vetë-vrasjes bashkëshorten e tij, Bedria Loka.
Xhemal Loka është njohur me masën e sigurisë, ndërsa ndaj tij rëndon edhe akuza për armëmbajtje pa leje.
Familjarët e tij ishin mbledhur jashtë gjykatës së Durrësit, Xhemal Loka u pa brenda kafazit të xhamit, i qetë, duke pritur vendimin.
Avokati mbrojtës së 45-vjeçarit ka deklaruar se nuk ka pasur asnjëherë kallëzim për dhunë në polici ndaj viktimës Bedrie Loka.
Sipas tij, paratë e gjetura në banesë janë për të mbuluar shpenzimet e funeralit, ndërsa tha se në ambientet e spitalit, e ndjera i ka kërkuar falje vajzës, bashkëshortit dhe vëllait të saj.
“Debate në familje ka çdokush, ndërkohë që nuk ka asnjë kallëzim për dhunë në polici. Mos harroni që janë 4 fëmijë jetim jashtë të cilëve nga reagimet dhe media po i krijohet përshtypja se është babai vrasës.
Paratë që i janë gjetur nuk i ka pasur për t’iu shmangur drejtësisë, por për të mbuluar shpenzimet funerale. Në spital Bedria i ka kërkuar falje për aktin e kryer vajzës, bashkëshortit dhe vëllait të tij.
Rrezikshmëria e tij për t’u larguar e prishur prova nuk ekziston. Ndaj kërkoj një masë shtrënguese më të butë, arrest në shtëpi”-deklaroi avokati i Lokës.
Ndërkohë, Prokurori i çështjes ka deklaruar se ndalimi i bashkëshortit të saj, Xhemal Lokës, është i ligjshëm dhe kërkoi masën e sigurisë arrest me burg, pasi konsiderohet person me rrezikshmëri.
