Edhe sot temperaturat në të gjithë Shqipërinë do të jenë të larta. Sipas Meteoalb, në të gjithë territorin do të mbetet dominant moti i kthjellët dhe temperaturat e larta deri në mesditë kurse në ekstremin verior dhe verilindor do të ketë vranësira të përkohshme.
Pjesa e dytë e ditës, do të karakterizohet nga kthjellime në bregdet dhe zonat e ulëta ndërsa kthjellime dhe vranësira kalimtare do të ketë në zonat malore lindore. Në të njëjtat kushte do të mbetet mbrëmja dhe orët e natës, në të gjithë territorin shqiptar.
Përsa i perket, Temperaturave te ajrit nuk priten ndryshime të ndjeshme duke bërë që maksimumi në rang vendi të mbetet rreth vlerës 38ºC – 39 ºC .
Era do të fryjë kryesisht e lehtë por mesatare pas mesditës duke arritur shpejtësi 28 km/h nga drejtimi veriperëndimor dhe verior, për në det do të ketë dallgëzim 1 – 2 ballë.
Për sa i përket motit në Europë, Europa Perëndimore dhe Qëndrore do të mbeten nën dominimin e vranësirave të shoqëruara me stuhi ere dhe shira të konsiderueshëm. Po ashtu, një pjesë e Europës Veriore – verilindore paraqitet kryesisht me vranësira dhe shira të përkohshëm.
Në Europën Jugperendimore dhe juglindore dominojnë kthjellimet dhe temperaturat shumë të larta, më e theksuar nxehtësia në zonat Juglindore të Europës.
