Partia Demokratike bashkon votat me mazhorancën duke bërë të mundur emërimin e Drejtorit të ri të Përgjithshëm të Radio Televizionit Shqiptar.
Pas një periudhe të gjatë ngërçi, që solli dhe ndryshimin e Ligjit për Mediat Audiovizive, që sanksiononte edhe zgjedhjen me shumicë të thjeshtë të votave të Drejtorit të RTSH, pas tre raundeve të votimit, sot Këshilli Drejtues i RTVSH ka mundur të emërojë kandidatin e hershëm Thoma Gellçi, si Drejtor i Përgjithshëm i medias së vetme audiovizive publike.
Por, edhe pse me ndryshimin ligjor Gellçi mund të votohej edhe me shumicë të thjeshtë në raundin e fundi, pra edhe me rezultatin 6 me 5 në favor të tij, ai ka mundur të zgjidhet në raundin e parafundit, me një votë më shumë të marrë edhe nga anëtarët e Këshillit Drejtues që përfaqësojnë opozitën politike, pra me rezultatin 7 vota pro tij dhe 4 kundër.
Këshilli Drejtues përbëhet nga 5 anëtarë të propozuar nga Partia Socialiste, 5 nga Partia Demokratike dhe një nga Lëvizja Socialiste për Integrim.
Rrjedhja e një vote nga pesë anëtarët e Këshillit Drejtues që përfaqësojnë opozitën pranohet edhe nga këta të fundit.
Edhe pse nuk ka një qëndrim zyrtar të anëtarëve përfaqësues të opozitës, apo dhe nga drejtues të vetë opozitës burime të sigurta të Televizionit Klan, pohojnë se pro Thoma Gellçit, përveç 6 anëtarëve të shumicës, ka votuar edhe Saimir Kumbaro, anëtar i Këshillit Drejtues që përfaqëson Partinë Demokratike.
Saimir Kumbaro, regjisor i njohur, është edhe i afërm i Deputetit të PD -së Genc Pollo njëkohësisht kryetar i Komisionit Parlamentar të Medias, i cili mendohet se ka ndikuar edhe në përzgjedhjen e Kumbaros si përfaqësues i opozitës në Këshillin Drejtues të RTVSH -së.
Nuk dihet arsyeja se përse z. Kumbaro ka dhënë votën e tij pro zgjedhjes së Thoma Gellçit si Drejtor i Përgjithshëm i RTVSH, në një kohë kur katër anëtarët e tjerë të opozitës në Këshill, kanë votuar kundër tij, si në 3 raundet e mëparshme.
Por ndërkohë që Kumbaro, apo dhe vetë ish – dhëndri i tij, Genc Pollo heshtin, reagimi i vetëm nga brenda Partisë Demokratike vjen nga Deputeti Luçiano Boçi, i cili në një postim thotë se: “Thoma Gellçi, ish – Kryeredaktori i “Zërit të Popullit”, pas ndryshimit të ligjit, që mund të quhet ligji Gellçi dhe jo Ligji për Mediat Audiovizive, u zgjodh për inatë të mazhorancës, Drejtor, me shumice të cilësuar 7 – 4.
Tejkaloi dhe ndryshimin ligjor, që u bë me aq djersë dhe mund“, shprehet me ironi Boçi, i cili shton se, tani u bind se RTSH do t’i kthehet popullit.
Por dhe vetë z. Boçi, edhe si anëtar i Komisionit të Medias, nuk e komenton votën pro, të z. Kumbaro si përfaqësues i opozitës në Këshill Drejtues, votë që në fakt jo vetëm thjeshtoi emërimin e z. Gellçi, por dhe shthuri qëndrimin e vetë opozitës në Këshillin Drejtues të Radiotelevizionit Shqiptar.
