Policia e Tiranës ka parandaluar një ngjarje kriminale duke sekuestruar dy mina me telekomandë, me eksploziv C4 me peshë 300 gram të programuara për shpërthim në distancë që do të përdoreshin nga dy vëllezër.
Autoritet bëjnë me dije se këto mina do të përdoreshin nga dy vëllezërit Jesar Shabaj, 20 vjeç, banues në Tiranë e në Shkodër dhe Jaser Shabaj, 23 vjeç, banues në Postribë, Shkodër. Në kuadër të operacionit të kduar “Brothers”, është arrestuar 20-vjeçari Jesar Shabaj.
Policia informon se “gjatë veprimeve hetimore të kryera në kuadër të procedimit për këtë rast, janë gjetur dhe sekuestruar, në cilësinë e provës materiale, 2 mina me telekomandë, me lëndë eksplozive C4 peshë 300 gram, të programuara për shpërthim në distancë (të pajisura me aparat celular dhe me kapsolla detonatore), të cilat dyshohet se do të përdoreshin për kryerjen e ngjarjeve të rënda kriminale. Gjithashtu janë sekuestruar aparati celular i 20-vjeçarit të ndaluar si dhe një përforcues grushti (dorezë metalike)”.
Vijojnë veprimet e thelluara hetimore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për të dokumentuar implikimin e personave të tjerë, të përfshirë në këtë veprimtari kriminale./Opinion.al
