Një analizë e ushtrisë dhe Shërbimit Federal të Inteligjencës gjermane tha se Rusia po përgatitet për një konflikt të ardhshëm me Perëndimin. Një sulm ndaj NATO-s konsiderohet i mundshëm në vetëm pak vite.
Rusia do të jetë gati për një luftë kundër vendeve të NATO-s para vitit 2030, nëse lufta në Ukrainë përfundon së shpejti, sipas inteligjencës gjermane. Këtë e deklaroi për DW Bruno Kahl, kreu i Shërbimit Federal të Inteligjencës Gjermane: “Ky afat bazohet në të dhëna shumë të besueshme, por varet edhe nga zhvillime specifike. Pra, nëse konflikti ushtarak në Ukrainë qetësohet më herët, atëherë ata do të jenë në gjendje të përbëjnë një kërcënim për Evropën shumë më herët.”
Kreu i inteligjencës gjermane theksoi se Gjermania, Evropa dhe territoret e vendeve anëtare të NATO-s janë tashmë skenë e aktiviteteve ruse që shkojnë përtej nivelit të zakonshëm të spiunazhit. “Ne kemi qenë dëshmitarë të ndikimit hibrid, veçanërisht gjatë zgjedhjeve që u zhvilluan në Evropë.”
Sipas kreut të inteligjencës gjermane, Rusia po kërkon të rikthejë rendin botëror që ekzistonte në vitet 1990, kryesisht kufijtë e vjetër të NATO-s, të cilët nuk përfshinin ende vende të Evropës Lindore si Bullgaria, Hungaria, shtetet baltike, Rumania, Republika Çeke, Sllovenia dhe Sllovakia. Rusia dëshiron të zgjerojë ndikimin e saj në këto shtete.
Për autoritetet ruse, rishikimi i kufijve do të ishte “i dëshirueshëm pa amerikanët në Evropë. Deri më tani, vetëm rusët e kanë dëshiruar këtë. Ne vërtet shpresojmë që amerikanët të mos e duan këtë,” përfundon kreu i inteligjencës gjermane.
