Monitoruesi Ndërkombëtar i Biznesit pjesë e Agjencisë Ndërkombëtare të vlerësimit financiar ”Fitch” rendit të tjera rreziqe që mund t’i kanosen Shqipërisë në muajt e ardhshëm.
Në një raport të fundit ajo paralajmëron se kriza e emigrantëve me të cilën po përballet sot Europa mund të luajë rol negativ për Shqipërinë, pasi vendi ynë mund të bëhet urë kalimi në rrugën e tyre për në Europën Perëndimore, sidomos për sirianët.
Shqipëria thotë raporti mund të bëhet alternativë kryesore kalimi për emigrantët drejt Europës Perëndimore, pasi vende të tilla si Hungaria, Kroacia dhe Sllovenia kanë ndërtuar gardhe kufitare për të ndaluar hyrjen e tyre.
Përsa i përket ekonomisë Monitoruesi Ndërkombëtar i Biznesit thotë se Shqipëria në vitet e ardhshme, do të qëndrojë në një trajektore të ulët të rritjes ekonomike mes nivelit të ulët të eksportëve dhe përpjekjeve të qeverisë për konsolidim fiskal.
Raporti i bën thirrje qeverisë, që për të qenë e zhvilluar në rajon ajo duhet të bëjë më shumë përpjekje në reformat strukturore, që kanë për qëllim luftimin e korrupsionit dhe përmirësimin e fleksibilitetit të tregut të punës.
Kujdes kërkohet edhe nga ndikimi i krizës greke që mund të prekë vendin tonë nëpërmjet remitancave dhe eksportëve.
Tv Klan
