Trajneri i Peskarës, Masimo Odo, i është kthyer çështjes së pezullimit të Rei Manajt, duke e cilësuar si diçka normale kur bëhej fjalë për sjellje të papërshtatshme. Në fjalët e tij, ishte një sinjal i qartë për sulmuesin shqiptar që të kthehej me këmbë në tokë pasi për momentin ishte një lojtar si të gjithë të tjerët e nuk duhej ta shihte veten si yll.
“Pas zgjedhjes time nuk ka asnjë çështje. Thjesht Manaj nuk është as Toti e as Kanavaro ndaj është rasti t’i lihet të kuptohet se kur po gabon, meqë është 19 vjeç dhe duhet të kthehet në rrugën e duhur”, ishin fjalët e Odos pas ndeshjes së sotme me Romën.
Për këtë çështje ka folur edhe menaxheri i Manajt, Alberto Maria Fontana, i cili e ka vlerësuar zënkën e sulmuesit shqiptar me portierin Fiorilo si një situatë që mund të ndodhte kudo. Sipas tij, situata mund të kapërcehej pasi Manaj nuk bënte asgjë me dashakeqësi.
“I respektoj vendimet e trajnerit Odo si ato të të gjithë trajnerëve. Kam njohur pak lojtarë me zemër më të mirë se ajo e Manajt.
Këto janë gjëra që mund të ndodhin në dhomat e zhveshjeve. Ndoshta ky moment ku ka mungesë rezultatesh, rrit tensionet. Rei është një lojtar i ri dhe ka dëshirë të paraqitet mirë te Peskara. Janë situata që mund të kalohen me mirëkuptimin e të gjithë palëve”, tha menaxheri i futbollistit.
