Dy janë kompanitë që kanë ushtruar veprimtarinë e tyre në Shqipëri dhe që kanë pasur marrëdhënie me studion “Mossack Fonseca”, e cila është vënë në qendër të skandalit botëror të fshehjes së pasurive, të njohur si “Panama Papers”.
Ky informacion jepet në hartën e të gjitha vendeve të prekura nga skandali ku thuhet gjithashtu se janë 3 përfitues dhe 22 pronarë aksionesh.
Emrat e tyre nuk bëhen publikë, por sipas gazetes izraelite “Haretz”, njëra nga kompanitë është në pronësi të Assaf Halkin, i cili në Shqipëri ka operuar me kompaninë e tij GFI Technologies, e regjistruar në maj të vitit 2013 në ishullin e Anguilla.
Në Shqipëri ai krijoi kompaninë GFI Albania në bashkëpunim me një kompani kanadeze. GFI Albania fitoi koncesionin e markimit të hidrokarbureve dhe e ushtroi atë deri në dhjetor të vitit 2015, kur kontrata u prish, sipas saj për shkak se qeveria shqiptare nuk përmbushi detyrimet në kontratë duke e detyruar atë të punojë me 30% të kapacitetit të saj.
Prej shkurtit 2014, Halkin ka themeluar edhe një tjetër kompani në Tiranë, IMAH 2014 që merret me tregtim, import, eksport të të gjithe mallrave, të çdo makinerie dhe pajisje industriale, pasurive të luajtshme dhe të paluajtshme, etj. Pjesë e kësaj kompanie janë edhe shqiptarët Ismail Mulleti dhe Entela Shehaj.
Halkin u kontaktua nga mediat izraelite për aktivitetin e tij, por ai nuk bëri komente për këtë çështje. Ai tha se të gjitha të ardhurat e aksionerëve izraelitë raportohen në organet tatimore të këtij vendi. /Tv Klan
