Një refugjat sirian ka fituar rreth 1 milion euro në lotarinë franceze, pasi bileta fituese ishte mes disa biletave gërvishtëse që kishte marrë. Burri, që është në tridhjetat, u largua nga vendi i tij më 2011 ku ishte biznesmen dhe u vendos në periferin veriore të Parisit, ku gjeti punë si punëtor krahu.
Ai e bleu biletën fatlume disa muaj më parë në Paris, por detajet se fituesi ishte sirian u bënë të ditura dje nga lotaria franceze.
Sipas raportimeve të mediave franceze, ai i përdori paratë për të blerë një apartament dhe do të sjellë pjesën tjetër të familjes në Francë. Ai gjithashtu ka në plan të hapë një restorant dhe të përmirësojë frëngjishten e tij.
Para se të shkonte në Francë, burri kishte një biznes të tijin në Siri, por u detyrua ta braktiste vendin për shkak të luftës që ka zhvendosur gati gjysmën e popullsisë dhe ka vrarë më shumë se 250 mijë njerëz.
