Pavarësisht gjallërimit të ekonomisë që prej fundit të vitit 2016 deri në tremujorin e dytë të vitit 2017, ku rritja ekonomike rezultoi 4.06 për qind, niveli më i lartë ky që nga viti 2012, konsumi i popullatës që ka qenë gjeneratori i rritjes ekonomikë në vendin tonë vijon të shfaqë dobësi.
Sipas të dhënave të INSTAT konsumi i popullatës në tremujorin e dytë të këtij viti u rrit me 2.27%, nivel i përafërt me atë të tremujorëve të fundit, teksa rritja ekonomike ishte më e larta e pesë viteve të fundit.
Konsumi po zgjerohet më ngadalë sesa në periudhën 2013-2014, kur rritja ekonomike nuk e kalonte 2 përqindëshin (shih grafikun).
Periudha janar-mars përkoi me fillimin e krizës politike, ku bizneset raportuan një frenim të blerjeve, por edhe një rënie të shitjeve, ndërsa zgjedhjet në tremujorin e dytë e kanë mbajtur disi situatën pezull.
Edhe të dhëna të tjera mbështesin konsumin anemik. Në tremujorin e dytë 2017, indeksi i volumit të shitjeve në tregtinë me pakicë është rritur 1,6 %, krahasuar me të njëjtën periudhë të vitit 2016. Krahasuar me tremujorin paraardhës, ky tregues i përshtatur sezonalisht është rritur 1,4 %, niveli më i ulët i viteve të fundit.
Në kahun tjetër, rritja e fortë ekonomike në pjesën e parë të vitit, sipas INSTAT ka ardhur kryesisht nga sektori i ndërtimit, i ndihmuar nga dy faktorë, punët publike që u përshpejtuan në prag të zgjedhjeve dhe ndërtimet për gazsjellësin TAP.
Si punët publike, ashtu edhe TAP nuk kanë efekt të drejtpërdrejtë në rritjen e konsumit, siç do të kishte, nëse rritja do të kishte ardhur psh nga investime më direkte në ekonomi, të orientuara nga rritja e punësimit dhe produktivitetit.
Ekonomia shqiptare ka përshpejtuar ritmet e rritjes, duke u zgjeruar me 4.06% në tremujorin e dytë të vitit, sipas të dhënave të publikuar nga INSTAT, e nxitur nga punimet për TAP, rrugë, stadiume etj, por edhe punimet në kryeqytet, teksa Tirana duket se është kthyer tashmë në një kantier. Ndërtimi u rrit me gati 23% me bazë vjetore në tremujorin e dytë.
Por, kjo rritje nuk po rezulton gjithëpërfshirëse, siç po reflektohet dhe nga treguesit e konsumit, që janë të lidhur ngushtësisht me ecurinë e pagave. Të paktën deri në fund të vitit 2016, paga reale në ekonomi shënoi një rënie prej 2.1%, sipas të dhënave të mëparshme të INSTAT./Monitor
