Presidenti amerikan Donald Trump ka ndërmarrë një sulm të ashpër mbi prokurorin special Robert Mueller dhe kritikëve të tij në një takim me konservatorët.
Në një fjalim të gjatë, Trump kritikoi hetimin mbi ndërhyrjen e dyshuar të Rusisë në zgjedhjet e vitit 2016.
“Ne po presim një raport nga njerëz që nuk janë zgjedhur nga populli. Fatkeqësisht, ndodh që të vendosen njerëz të gabuar në disa pozicione dhe qëndrojnë në to për një kohë të gjatë, dhe papritur të hedhin baltë”, , tha ai para turmës së konservatorëve.
Trump e ka cilësuar vazhdimisht hetimin e prokurorit të posaçëm, një gjueti shtrigash. Fjalimi që zgjati për më shumë se dy orë, përfshinte edhe sulme mbi ish prokurorin e përgjithshëm, Jef Sessions, ish drejtorin e FBI James Comey, Partinë Demokratike e të gjithë ata që kanë kritikuar qëndrimin e tij ndaj Koresë së Veriut.
Ndër të tjera ai tha se Mueller ka qenë shoku më i mirë i ish-shefit të FBI-së, James Comey, ndërsa ironizoi mënyrën e të folurit e ish-prokurorit Sessions, të cilin e shkarkoi në nëntor të vitit të kaluar. Fjalimi i Trumpit erdhi pas një jave të ngarkuar për të, pasi vetëm disa ditë më parë ish-avokati i tij e quajti atë racist, mashtrues dhe person të korruptuar, shkruan “BBC”./E.M
