Është dënuar me 1 vit e gjashtë muaj burgim ish-kreu i Kadastrës së Beratit, Ervin Nelaj. Vendimi është dhënë ditën e sotme nga Gjykata e Posaçme Kundër Korrupsionit dhe Krimit të Organizuar.
Sipas news 24, për Nelajn SPAK kishte kërkuar 3 vite burg.
Po ashtu, me 1 vit e 4 muaj është dënuar Xhekisa Toto, e cila ishte e pandehur bashkë me Nelajn. Për Toton SPAK kishte kërkuar 2 vite burg dhe më pas pezullimin e dënimit. Dënimet për dy ish-zyrtarët janë me gjykim të shkurtuar.
Hetimet për kreun e Kadastrës zgjatën 9 muaj. Sipas prokurorisë, janë siguruar prova se shtetasi Ervin Nelaj, në cilësinë e Drejtorit të Drejtorisë Vendore të Agjencisë Shtetërore të Kadastrës, Berat, në bashkëpunim me punonjës të tjerë në këtë institucion, kanë marrë në disa raste përfitime monetare, me qëllim për të kryer veprime që lidhen me detyrën e tyre, për legalizimin e objekteve informale dhe regjistrimin e titujve të pronësisë.
