Detaje të reja janë zbardhur në lidhje me vrasjen e 25-vjeçarit Klodjan Rasha nga një efektiv policie në orët e para të mëngjesit të sotëm në rrugën “Dritan Hoxha”.
Janë mësuar lëvizjet që i riu ka bërë para se të qëllohej nga polici vetëm pak metra larg banesës së tij, pasi sipas njoftimit të policisë, ai nuk i është bindur urdhrit dhe ka kërcënuar efektivin.
25-vjeçari deri në orën 23:00 kishte qenë në një lokal në zonën e “Don Boskos” dhe më pas teksa kthehej për në banesë i është bërë shenjë nga patrulla e policisë që të ndalonte.
Por, i riu nuk ka ndaluat dhe është futur në disa rrugica për të shmangur policët, por 100 metra larg banesës së tij, ai është qëlluar nga efektivi i policisë me dy plumba të cilët i shkaktuan vdekjen.
Më herë, policia tha se efektivi qëlloi të riun për shkak se 25-vjeçari e ka kërcënuar dhe në kushte të errësirë policia e ka qëlluar. Por ky version hidhet poshtë nga banorët e zonës të cilët shprehen se rruga është e ndriçuar.
Më vonë, u bë me dije se në vendin e ngjarjes u gjet një pistoletë që dyshohet se i përkiste viktimës, por dhe ky version u hodh poshtë nga xhaxhai i Klodjan Raxhës, i cili tha se ai nuk ka pasur armë, por vetëm dy kokrra hurma.
Por, edhe nëse viktima të ketë qenë i armatosur, Policia nuk bën të ditur që i riu e ka përdorur atë, duke ngritur dyshime në lidhje me të drejtën e përdorimit të armës nga ana e efektivit.
Ndërkohë, kamera një servisi në zonën ku u ekzekutua me armë zjarri Klodjan Rasha pas mesnatës së djeshme mund të hedhë në dritë në lidhje me këtë ngjarje. Aktualisht punonjësi i policisë që qëlloi ndaj 25-vjeçarit, shtetasi me inicialet N.H., po merret në pyetje nga kolegët e tij./ Opinion.al
