Mbrojtësit Hysen Memolla e Ivan Balliu dhe sulmuesi Valon Ahmedi janë prurjet e reja të Christian Panucci në Kombëtare. Memolla që luan me Hajdukun e Splitit në Kroaci dhe Balliu me Metz në Francë grumbullohen për herë të parë me Shqipërinë, ndërsa shqiptari i Maqedonisë Valon Ahmedi Ahmedi që aktivizohet me Mariborin në Slloveni ka qenë pjesë e përfaqësuesve të moshave.
Këto lëvizje ishin paralajmëruar në media dhe trajneri Panucci zyrtarizoi këtë të premte, disa ditë para afatit emrat e futbollistëve, të cilët do të nisin grumbullimin nga e hëna për ndeshjet kualifikuese të Botërorit me Lihtenshtejnin më 2 shtator në Elbasan dhe me Maqedoninë më 5 shtator në Strumicë. Konfirmohet mungesa e Taulant Xhakës, i cili u përfol se nuk e takoi trajnerin gjatë vizitës së tij në Bazel.
Duket se Xhaka vijon problemet me Kombëtaren Shqiptare të nisura që në ndeshjet e fundit me ish-trajnerin De Biasi. Jashtë ka mbetur edhe Ergys Kaçe me Naser Alijin, ndërsa Bekim Balaj nuk është grumbulluar për shkak se vuan nga një dëmtim. Trajneri Cristian Panucci nuk ka preferuar të marrë kësaj here as Liridon Latifin e Skënderbeut i cili u afrua në ndeshjet e fundit nga Gianni De Biasi. Tv Klan
