Kur lojtari më i mirë i skuadrës kritikon, diçka e keqe po ndodh. Ylli i Atletico Madridit, Antoine Griezmann, ka paralajmëruar shokët e tij të skuadrës se mund të bien nga La Liga, nëse nuk fillojnë të përmirësohen. Djemtë e Diego Simeones ende nuk e kanë gjetur fitoren, teksa kanë barazuar në dy ndeshjet e para të kampionatit. Askush nuk e priti, por bardhekuqtë dolën 0-0 dje ndaj skuadrës së porsangjitur në La Liga, Leganes. Griezmann, i cili bëri paraqitjen e tij të parë të sezonit, theksoi se Atletico duhet të përmirësohet shpejt.
“Nëse vazhdojmë kështu, do të luftojmë për të mos rënë nga kategoria. Jemi të nevrikosur, por duhet të shkundemi mirë, përndryshe do të dalim jashtë duarsh. Duhet të fillojmë të jemi vetvetja”, – tha francezi, i cili u rikthye në Madrid pas Kampionatit Evropian 2016, ku fitoi “Këpucën e Artë” me gjashtë gola. 25-vjeçari tha se ende i duhet shumë punë për t’u rikthyer në formën më të mirë. “Jam mirë, më duhet vetëm pak ritëm. Po punoj të kthehem në nivelin tim”, – shtoi ai. Ndeshja e radhës e nënkampionëve të Evropës luhet më 10 shtator me Celta Vigon.
