VLORE- Banorët e një lagjeje në Vlorë janë ndjerë të frikësuar dhe kanë njoftuar policinë pasi kanë parë një mbishkrim “ISIS, Allahu Ekber” në stacionin e urbanëve.
Burime zyrtare të policisë bëjnë me dije se flamuri prej letre është konstatuar në lagjen “Osman Haxhiu”, rreth orës 08.00 të mëngjesit në një kioskë për shitjen e gazetave, pranë stacionit të autobusit.
Vizatimi i bërë me stilolaps shoqërohej nga mbishkrimi “ISIS, Allahu Ekber”. Letra e gjetur ka shkaktuar panik tek të pranishmit, të cilët kanë lajmëruar menjëherë uniformat blu.
Policia bën të ditur se letra e bardhë e gjetur dyshohet të jetë shkëputur nga ndonjë libër i shkollës 9-vjeçare por që nuk është identifikuar ende. Policia ka nisur hetimet për origjinën e këtij veprimi dhe identifikimin e autorëve.
