Pas skandalit botëror të fshehjes së të ardhurave në Panama ka reaguar edhe një prej themeluesve të firmës ligjore në fjalë, “Mossack Fonseca”.
Ramon Fonseca ka pranuar se disa prej dokumenteve janë autentikë dhe janë marrë në mënyrë të paligjshme në shkelje me të drejtën themelore të njeriut për privatësi.
Ai thotë se jo të gjithë emrat e publikuar deri më tani janë klientë të firmës së tij. Ai e cilësoi rastin investigativ si një sulm ndaj Panamasë, mirëpo shprehu gatishmëri për të bashkëpunuar me organet e hetuese të vendeve të ndryshme.
“Shumë vende nuk e durojnë dot faktin që ne jemi një vend tërheqës për kompani të tilla. Megjithatë, qeveria e Panamasë ka tolerancë zero ndaj evazionit fiskal. Disa prej dokumenteve janë të vërteta dhe janë marrë në mënyrë të paligjshme.
Ky është sulm ndaj privatësisë, e cila është e drejtë e shenjtë e njeriut. Ne nuk kemi bërë asgjë të gabuar. Çdo gjë është bërë sipas ligjit këtu. Por ne jemi të hapur që të bashkëpunojmë me organet hetuese të vendeve të huaja”, ka thënë ai.
