Më 2 Mars, në Athinë do të hapë dyert një panair pune, i cili ka për qëllim që shqiptarët që jetojnë atje të kenë mundësi të punësohen ose të investojnë në Shqipëri.
Lajmi është bërë i ditur nga kryeministri Edi Rama, në komunikimin “Sy m’sy”, në rrjete sociale me qytetarët.
Ai sqaroi se do të vihet në dispozicion një webfaqe, ku do të mund të shihen të gjitha ofertat e punës, qoftë sezonale apo vjetore.
“Kemi një panair të madh në Athinë me 2 mars, në një ditë të gjatë me shumë aktivitete ku synojmë të vëmë në kontakt të drejtpërdrejtë shumë kompani shqiptare të Shqipërisë në ndërtim, turizëm, inovacion me bashkatdhetarët tanë në Athinë edhe më gjerë mbase.
Gjithë materiali do jetë në dispozicion edhe në një faqe web online, ku të gjithë mund të hyjnë dhe të shohin mundësitë që janë për të lidhur kontrata pune, qoftë sezonale për turizmin, apo gjithë vjetore në fusha të tjera. Sfida është që të thyejmë këtë stereotipin, sipas të cilit, në Shqipëri pagat janë shumë të ulëta dhe mundësitë janë të pakta.
Dhe ta thyejmë stereotipin me fakte dhe pasqyra konkrete që janë të aksesueshme dhe në të cilat mund të shihen kontratat, modelet dhe kushtet. Kështu që besoj se do të jetë një fillim i mbarë. Natyrisht është vetëm hapi i parë. Këto panaire do t’i bëjmë traditë në muajt dhe vitet e mandatit të 4 sepse do ta lidhim procesin e negociatave për anëtarësim me procesin e nxitjes së kthimit për të investuar apo punuar këtu në Shqipëri.
Kur flas për kthim kam parasysh jo vetëm ngritjen e plaçkave por edhe kthimin e pjesshëm apo investimin këtu duke qëndruar atje. Në të gjitha rastet unë besoj do të jetë një përfitim reciprok qoftë për ata që kthehen qoftë për vendin”, u shpreh kryeministri.
