Një ngjarje e rëndë ka ndodhur sot në Shkodër, ku një banesë dykatëshe u përfshi nga flakët, e për pasojë një i moshuar dyshohet se ka humbur jetën.
Rasti është regjistruar në lagjen ‘Rus’. Po ashtu, mësohet se i moshuari, nuk ka arritur të dalë për shkak të flakëve dhe dyshohet se ka humbur jetën.
Në pamjet e siguruara nga “BalkanWeb” duken jo vetëm zjarrfikësit duke punuar për fikjen e zjarrit por edhe vetë banorët. Madje disa prej tyre kacavirren në mur. Ngjarja ka hapur panik në të gjithë lagjen.
Ndërkohë sipas raportimeve, zjarri rrezikon edhe tre banesa të tjera ngjitur. Në vendin e ngjarjes ndodhen 3 zjarrfikëse që po luftojnë për shuarjen e flakëve.
Dyshohet se shkak për zjarrin ka qenë shpërthimi i një bombole gazi. Policia ka nisur evakuimin e banorëve nga shtëpitë që rrezikojnë nga flakët.
NJOFTIMI I POLICISË
Me datë 10.03.2017, në orën 16.12 njoftohemi se në lagjen “Vojo Kushi”, Shkodër, në vendin e quajtur rruga e Vajgurit, në një banesë dy katëshe ku jetojnë dy familje, ka rënë zjarr.
Menjëherë në vendngjarje kanë shkuar shërbimet e policisë dhe zjarrfikësit.
Punonjësit e policisë kanë evakuuar shtetasin R. H së bashku me familjen.
Ndërsa në banesën e shtetasit H.H., 74 vjeç, punonjësit e policisë dhe zjarrfikësit nuk u futen dot për shkak të përmasave të mëdha të flakëve e që kishin përfshirë këtë banesë.
Shtetasi H.H. sipas deklarimeve të bashkëshortes dyshohet se ka ngelur brenda në banesë, ndërsa bashkëshortja ka dalë pa pësuar lëndime.
Në vendngjarje ndodhen shërbimet e Policisë, zjarrfikëset dhe autoambulanca.
Punohet për fikjen e zjarrit. Veprimet po kryhen me grup hetimor, në përfundim do të jepet dhe informacion i plotë.
