Një kalimtare ka humbur jetën, pasi u përplas për vdekje nga një automjet tip kamion. Ngjarja ka ndodhur paraditen e sotme në Kamëz.
Nga të dhënat e para mësohet se gruaja u përplas teksa kalonte rrugën. Policia njofton se aksidenti ndodhi rreth orës 09:40, tek ura e Institutit.
“Drejtuesi i mjetit Kamion shtetasi Xh. Ç., ka aksidentuar shtetasen Xhemile Ukdashi, 70 vjeç, e cila ka ndërruar jetë në spital” njofton policia.
Ajo u dërgua në spital, por nuk mundi dot t’i mbijetonte plagëve të marra. Policia po heton për zbardhjen e shkaqeve të aksidentit, ndërkohë që u shoqërua drejtuesi i mjetit.
“Tv Klan” ka publikuar videon nga momentet e aksidentit, me pamje te rënda ku gruaja duket e shtrirë në tokë e mbuluar nga gjaku në rrotat e kamionit.
Dëshmitarët në vendgjarje, por dhe burime nga policia rrugore bëjnë me dije se Xhemile Ukdashi qendroi e plagosur për rreth 40 minuta pasi autoambulanca vonoi të vinte në vendngjarje, shkruan “Tv Klan”.
