Fakti që Policia e Shtetit nuk ka akses në kamerat e sigurisë së Aeroportit “Nënë Tereza” është ngritur si shqetësim në Komitetin e Sigurisë së Rinasit, edhe nga përfaqësuesja e Misionit “Pameca”.
Teuta Krasniqi, e cila merrte pjesë në mbledhjen e datës 13 maj, në emër të Misionit të Asistencës Policore të Komunitetit Europian në Shqipëri, ka ngritur shqetësimet për çështjen e sigurisë. Sipas saj, Policia duhet të ketë patjetër akses në kamerat e sigurisë, pasi në rast se diçka ndodh në Aeroportin e Rinasit, askush nuk thotë se një gjë ka ndodhur dhe se në Aeroport është një kontraktues gjerman.
Nga ana tjetër, Krasniqi ka ngritur edhe një tjetër problem sigurie, që sipas saj është mungesa e barrierave mes aeroportit dhe parkingut. Nga ana tjetër, i pranishëm në këtë mbledhje, edhe zv.ministri i Transporteve Bahri Shaqiri ka kërkuar që të merren masa të menjëhershme nga TIA, pasi situata në aeroport nuk është e mirë.
Duke iu referuar raportit të datës 20 prill, mbi tri testimet sekrete të kryera nga Aviacioni Civil dhe Policia e Shtetit, Shaqiri kërkoi marrjen e masave urgjente dhe një mbledhje të jashtëzakonshme për t’i prezantuar ato në Komitetin e Sigurisë.
Sipas tij, duhen rishikuar masat dhe sugjerimet për të përmirësuar menjëherë situatën e sigurisë në Aeroportin e vetëm kombëtar. Më poshtë, pjesë nga raporti i mbajtur në mbledhjen e Komitetit të Sigurisë Kombëtare të Aviacionit Civil Shqiptar.
DEBATI
Bahri Shaqiri: Nga raporti që unë kam parë në Ministri dhe informacionet që kanë ardhur nga institucione të shtetit, rezulton që gjendja nuk është e mirë në Aeroportin e Rinasit. Unë do të këshilloja që raporti t’i shkojë menjëherë dhe brenda një kohe shumë të shkurtër nga kompania t’i bëhet një raportim këtij komiteti për çfarë është dakord e çfarë jo, të marrë masa të menjëhershme. Theksoj, të menjëhershme, për përmirësimet e problematikës. Me këtë kontroll është bërë një punë e shkëlqyeshme nga AAC-ja dhe Policia Kufitare. Të gjitha këto probleme që tha z. Genc Merepeza janë të mbartura dhe nuk vihet re asnjë lloj ndryshimi nga ana e kompanisë suaj. Unë do të këshilloja dhe për një mbledhje tjetër jashtë radhe të komitetit pas përgjigjes që do të dërgojë kompania, në të cilën të shikojmë për sugjerimet dhe masat që do të marrë për përmirësimet e menjëhershme të situatës.
Aleksandër Lipivani: Do të ketë mbledhje. Ju jeni informuar për gjithçka nëpërmjet informacioneve të takimeve të z. Bujar me z. Vangjel Nikolla në ambientet tona. Tashmë gjithçka dihet dhe është e regjistruar nga kamerat. Pjesën e raportit do doja ta diskutoja paraprakisht me ju, pasi ka ardhur koha të merren vendime, veçanërisht për punët e sigurisë, se janë shumë të mprehta dhe duan zgjidhje të menjëhershme. Këtu ka problem që është vetëm një aeroport, se nëse do të kishte edhe aeroporte të tjera, kushedi se çfarë masash do të kishte.
Genc Merepeza: Në rastet e kompanisë që merret me punët e sigurisë në Aeroport, është më mirë që të funksionojë siç është, apo duhet t’i japim ndonjë shkundje që ajo të kryejë më mirë detyrat e veta. Kur shkoj unë në Rinas, dhe jam drejtori i Përgjithshëm i Policisë Kufitare, duhet të kaloj shumë procedura që të kaloj. Aleksandër Lipivani: Shkundjen ia japin këta (TIA), se këta e kanë për detyrë, ne mund të shkundim këta. Genc Merepeza: Po, po për këta e kam dhe unë.
Ilir Alimema: Pyetja ishte, a bën punë të mirë kjo kompani? Unë ju konfirmoj se bën punë të shkëlqyer, është viti i 11-të që kjo kompani është aty dhe është viti i 11- të që kjo kompani është e licencuar dhe e njohur nga autoriteti nën mbikëqyrjen e vazhdueshme. Drejtuesit e kësaj kompanie janë të licencuar po nga autoriteti, kështu që unë nuk mund të them gjë tjetër. Ne jemi absolutisht të kënaqur me punën që kryen kjo kompani.
Bahri Shaqiri: Më falni se ndoshta po bëhem pak këmbëngulës. Nuk dua të kundërshtoj në këtë lloj takimi. Janë të paktën 3 institucione shtetërore që kanë identifikuar probleme te ju dhe janë të tria institucione të specializuara dhe me profesionistë të lartë. Nuk e diskutoj dhe është e vërtetë ajo që ju thatë që duhet të vijë më parë raporti të shohësh çfarë ka ndodhur, ta analizosh e pastaj të hyjmë e ta diskutojmë. Problematika ekziston sepse të paktën të tria institucionet janë të të njëjtit mendim. Le të studiohet njëherë materiali e pastaj të vazhdojmë.
Teuta Krasniqi: Për sa i përket problemit të kamerave, unë si eksperte e pavarur mendoj se si ka mundësi që Policia të mos ketë akses mbi këto kamera? Nëse ndodh diçka në Aeroportin e Tiranës, askush nuk thotë që ka ndodhur kjo gjë dhe se në Aeroport është një kontraktues gjerman. Nëse tashmë do të ketë një kontraktues tjetër, unë mendoj se patjetër duhet të rishikohet mirë kontrata, roli i Policisë në atë kontratë duhet të përcaktohet qartë në draftin që do të përgatitet, që Policia të ketë akses në gjithë kamerat e Aeroportit. Një problem tjetër që mendoj se përbën shqetësim është edhe ajo se ndërmjet Aeroportit dhe parkimit nuk ka asnjë barrierë që të përbëjë pengesa. Kur isha herën e fundit në Aeroport, unë pyeta shefin e sigurisë aty te skanerat nëse i kanë në funksion apo jo mjetet që zbulojnë, jo vetëm lëndët eksplozive, por dhe nëse ka persona që kanë pasur kontakt me këto lëndë. Ai më tha menjëherë po, por edhe atij iu duk sikur pyetja ime ishte absurde. Unë nuk jam e sigurt që kompania e sigurisë atje i ka këto mjete./Panorama
