Deputeti i Partisë Demokratike, Edi Paloka, ka akuzuar kryeministrin Edi Rama se po zbaton politika ekonomike anti-shqiptare dhe në favor të interesave të tij personale.
Përmes një mesazhi në Facebook, Paloka sqaron se Rama po i jep naftën shqiptare firmës ruso-serbe të Vladimir Putinit, ndërsa i ka vënë traun me pagesë kosovarëve.
Ai nënvizon se detin dhe gjithë zonën naftëmbajtëse po ia jep Greqisë, pasi eleminoi krejtësisht Gjykatën Kushtetuese dhe ku askush më nuk pengon zbatimin e marrëveshjes që ka bërë.
Sipas tij, jo vetëm kaq, por vetëofrohet për të kthyer vendin në një kamp të madh refugjatësh nga Siria dhe Afrika, ndërkohë që ka çuar refugjatë 400 mijë shqiptarë.
Deputeti demokrat thekson se Shqipëria është damkosur si ishulli i krimit në Europë, por ai vazhdon të akuzojë opozitën se po pengon integrimin pasi ka mbrojtur Tahirin e vazhdon të mbajë Xhafën ministër të Brendshëm, kurse shqiptarët vazhdojnë të vetëvriten e të vriten.
Në fund të shënimit të tij, Paloka shkëput drejtpërdrejt dy paralele nga historia e vendit tonë, për të përshkruar simbolikisht konceptin e tradhtisë që për interesa personale hidhen në lojë interesat kombëtare.
Një gjë të tillë, ai e kryen përmes dy personazheve historike si Hamza Kastrioti dhe Esat Pasha, për të daravitur çdo dyshim rreth veprimtarisë së kryeministrit të vendit, ndërsa shton se ky është Edi Rama, pra aspak ndryshe.
