Nënkryetari i Partisë Demokratike, Edi Paloka e ka cilësuar të paralajmëruar atentatin ndaj prokurorit Ndoja. Në një intervistë televizive, Paloka tha se kryeministri duhet të denonconte prokurorin kur kishte marrë informacionet se ai shoqërohej me persona të dyshuar dhe jo vetëm pasi u dha vendimi për ish-drejtorin e Kadastrës së Durrësit. Kjo sipas tij tregon se ka një luftë mes bandave që kanë ndihmuar Ramën të fitojë vota gjatë zgjedhjeve.
“Të gjitha këto janë ngjarje të paralajmëruara dhe kemi denoncimet dhe kërcënimet e kryeministrit ndaj këtij prokurori, pastaj ndodh atentati. Rezulton që në makinë ishin persona me precedentë. Kryeministri di që një prokuror është i lidhur me bandën dhe në vend që t’i kërkojë policisë ta arrestojë, e denoncoi vetëm kur u kap drejtori i Kadastrës. Kjo është luftë mes bandash të Rilindjes. Atij që iu bë atentat dhe ai që bëri atenat janë dy grupe bandash që kanë bërë votat për Edi Ramën. Për këtë arsye Rama nuk e denonconte dot më parë, sot bandat i kanë dalë jashtë kontrollit Ramës. E ka ndarë Shqipërinë te këto grupe dhe ata nuk janë ngopur. Dhe sot ka arritur puna që kanë filluar përplasjet” tha Paloka.
Ai bën përgjegjës kryeministri gjendjen e vendit dhe deklaroi gjithashtu se tashmë Rama po dorëzon një bandë për një tjetër.
“Kryeministri është përgjegjësi kryesor, bandat e oligarkët sollën Ramën në pushtet, edhe viktima dhe agresori janë ata që sollën Ramën në pushtet i japin Ramës votat dhe si shpërblim duan këto dhe kur pronat mbarojnë atëherë fillon lufta me bandave dhe ndodh ajo që ndodh. Dhe kryeministri në këtë rast dorëzoi një bandë për një bandë tjetër” deklaroi numri dy i PD. /Opinion.al
