Kryetari i Grupit Parlamentar të LSI-së, Petrit Vasili, ka thënë se futja në kalendarin tre-javor të punimeve të Kuvendit të Shqipërisë të reformës në drejtësi nga data 13 qershor deri në 1 korrik, është një keqkuptim procedural.
Menjëherë pas deklaratës së Vasilit, ka reaguar kreur i Grupit Parlamendar demokrat, Edi Paloka, i cili ka thënë se nuk bëhet fjalë për një lapsus, por për një urdhër të Ramës për të manipuluar procesin.
“Na është thënë jo zyrtarisht që ka qenë një gabim i administratës dhe nëse del se nuk është kështu, mendoj se gjithsecili e ka të lehtë të gjykojë si vepron kjo mazhorancë, si vepron Rama që nuk pyet për rregulla e procedura, – tha deputeti demokrat. – Kjo është një shkelje rregullash, ne akoma nuk e kemi dorëzuar kallëzimin penal. Kërkojmë heqjen nga kalendari i punimeve të reformës në drejtësi më pas do të shohim”.
Paloka shtoi më tej se futja në kalendarin e punimeve të reformës në drejtësi nga qershori deri në korrik, është bërë me paramendim: “Nëse Kuvendi tërhiqet, ne do të rishohim pozicionin tonë sa i takon kallëzimit penal, sepse nuk duam që ndonjë punonjës i shtetit të bëhet ‘kokë turku’. Unë kam bindjen se nuk është një gabim apo lapsus i momentit, por një tentativë e qartë me urdhër të Ramës për të manipuluar kalendarin”.
Një ditë më parë, Kuvendi i Shqipërisë lajmëroi se paketa e reformës në drejtësi është përfshirë në kalendarin e punimeve të Parlamentit nga 13 qershori deri më 1 korrik. Fillimisht u përfol se konferenca e kryetarëve nuk vendosi që të përfshihet për shqyrtim paketa për ndryshimin e Kushtetutës si pjesë e reformës në drejtësi, duke mos pasur konsensus. Por pasdite vonë, u bë publike nga Kuvendi kalendari i miratuar në konferencën e kryetarëve, ku në punimet e komisioneve është përfshirja e ndryshimeve kushtetuese.
Por vendimi i konferencës ka shkaktuar reagimin e ashpër të opozitës, pasi sipas kreut të grupit parlamentar të PD-së, kjo është një procedurë e njëanshme. Në një prononcim për mediat, Paloka tha se është një shkelje e rëndë ligjore, që duhet kallëzuar edhe në gjykatë.
