Deputeti i PD-së, Edi Paloka ka njoftuar se Komiteti i të Drejtave të Njeriut Përparlamentar ka marrë në shqyrtim çështjen e shkeljes flagrante ndaj liderit të opozitës, Sali Berishës.
Paloka ka deklaruar se Komiteti Ekzekutiv ka vendosur që të dërgojë një mision në Shqipëri për këtë çështje.
Sipas tij, mësohet se sekretari i Unionit ka dërguar kërkesë formale tek kryeparlamentarja Spiropali lidhur me këtë çështje, për të cilën thotë se ka marrë urdhër që ta injorojë.
“Kryetarja e Parlamentit nuk do të guxonte kurrë të mbante një qëndrim të tillë ndaj organizatës më të madhe botërore parlamentare pa qenë e urdhëruar nga shefi i saj politik. Si anëtar i delegacionit shqiptar në Unionin Ndërparlamentar, unë bashkë me anëtarë të tjerë të delegacionit jemi thirrur në seanca pyetjesh prej Komitetit të të Drejtave të Njeriut në Unionin Ndërparlamentar.
Ky Komitet shqyrton me përparësi pikërisht shkeljet dhe abuzimet e rënda me të drejtat e deputetëve në të gjithë globin. Si zbatim të këtyre të drejtave që ka ky Komitet, ka marrë në shqyrtim dhe çështjen e shkeljes flagrante dhe presekucionit politik ndaj liderit të opozitës, Sali Berisha. Komiteti i të Drejtave të Njeriut Përparlamentar ka informuar Komitetin Ekzekutiv, organin më të lartë ekzekutiv të Unionin Ndërparlamentar lidhur me çështjen e Sali Berishës dhe Komiteti Ekzekutiv ka marrë vendim që të dërgojë një mision në Shqipëri për këtë çështje.
Sekretari i Unionit ka dërguar kërkesën e tij formale tek Elisa Spiropali, e cila duket se ka marrë urdhër për ta injoruar këtë kërkesë. Në kaq vite që jam pjesë e këtij Unioni, është rasti i parë që Unioni detyrohet të shqyrtojë një çështje që ka të bëjë me shkelje dhe abuzime të drejtave të deputetit të një parlamenti europian”, tha Paloka.
