Prokuroria e Tiranës ka marrë në pyetje punonjësit e burgut 302 në kryeqytet dhe burgut të Krujës në lidhje me hyrjen në këto institucione të pajisjes së përgjimeve “IMSI-Catcher”. Nga dëshmitë e marra prej punonjësve të burgjeve janë mësuar detaje të reja në lidhje me objektin e hetimit.
Njësia Task Forcë në Prokurorinë e kryeqytetit prej fillimit të muajit maj, po zhvillon hetime për shpërdorim detyre në lidhje me futjen ilegale të pajisjes së përgjimit “IMSI-Catcher” dhe mundësinë e përdorimit të saj brenda territorit të Shqipërisë. Në vazhdim të hetimeve, organi i akuzës ka marrë informacion për futjen e pajisjes në fjalë në disa burgje, mes të cilave edhe 302-shi në Tiranë dhe burgu i Fushë-Krujës.
Pas përcaktimit të datave kur ka ndodhur hyrja e makinës ku është montuar pajisja “IMSICatcher”, Prokuroria ka verifikuar dokumentet për personelin që ka qenë në punë në këtë kohë në hyrje të burgjeve. Këta punonjës janë marrë në pyetje nga Prokuroria dhe kanë dhënë detaje të rëndësishme në lidhje me ngjarjen.
DËSHMITË E PUNONJËSVE
Në dëshmitë e dhëna para prokurorëve, punonjësit e burgut 302 dhe atij të Krujës kanë thënë se makina me pajisjen “IMSI-Catcher” ka kërkuar të hynte në këto institucione në të gjitha rastet në orët e vona të mbrëmjes.
“Makina vinte pas orës 22:30 dhe në të gjitha rastet drejtohej nga personi që është prezantuar me emrin Entiol Xhelilaj”, kanë thënë dëshmitarët. Sipas tyre, në makinë në të gjitha rastet kanë qenë edhe dy persona të tjerë që nuk flisnin. Disa prej punonjësve të burgjeve kanë pohuar se në pjesën e pasme në kabinë kanë parë “një pajisje të ngjashme me laptopin me përmasa pak më të mëdha me ngjyrë të zezë”.
Në librat e hyrje-daljeve të burgjeve, të sekuestruar tashmë nga Prokuroria, janë shënuar targat e automjetit, emri i drejtuesit Entiol Xhelilaj, efektiv i Forcës Operacionale dhe qëllimi i hyrjes “për matjen e cilësisë së ajrit”.
Në të gjitha rastet, punonjësit e burgjeve kanë thënë se personat që kanë hyrë me pajisjen nuk kanë pasur urdhra apo autorizim me shkrim, madje kanë bërë debat me ta dhe në fund janë lejuar me urdhra të dhënë në telefon.
HETIMET
Tre zyrtarë dhe punonjës të Policisë së Shtetit janë në hetim nga Prokuroria për “shpërdorim detyre” me futjen e përdorimin ilegal të pajisjes së përgjimeve në Shqipëri. Prokuroria ka gjetur të dhëna për futjen e pajisjes në fjalë në burgun e Peqinit, burgun “Mine Peza” (njohur ndryshe si burgu 302) në Tiranë dhe burgun e Fushë- Krujës.
Hetimet po vazhdojnë nga ana e Prokurorisë, e cila është në pritje të përgjigjes për letërporosinë e dërguar në Itali. Letërporosia iu nis palës italiane, pasi pajisja e sjellë në Shqipëri nga misioni “Interforce” nuk u sekuestrua dot, pasi ditën e lëshimit të urdhrit automjeti me “IMSI-Catcher” u nxor nga godina e Policisë dhe u dërgua në zyrat e “Interforce”./Panorama
