Propozimi i qeverisë, që parashikon pagimin e punonjësve sezonalë edhe gjatë periudhave jashtë sezonit, është mirëpritur nga operatorët turistik dhe punonjësit.
Gjergji Plasa, student që punon në turizëm, e cilëson këtë si një nga nismat më të rëndësishme të qeverisë në mbështetje të studentëve.
Pas përfundimit të tre muajve të punës sezonale studentëve u duhej të kërkonin punë të tjera për të mbuluar shpenzimet. Me këtë nismë, ata jo vetëm që mund të sigurojnë të ardhurat e nevojshme, por edhe mund të zhvillojnë aftësitë e tyre profesionale.
Operatorët turistikë thonë se largimi i punonjësve sezonalë dhe trajnimi i vazhdueshëm i stafit të ri paraqesin sfida të mëdha për turizmin. Andaj ata e shohin si zgjidhje pagimin e punonjësve gjatë periudhave jashtë sezonit për të siguruar mbajtjen e tyre.
Operatorët turistik besojnë se zbatimi i kësaj nisme do të rrisë cilësinë e shërbimeve dhe do të ofrojë më shumë stabilitet në sektorin turistik.
Administratorët turistik kanë kërkuar prej kohësh këtë reformë për të adresuar mungesën e fuqisë punëtore, një situatë që i ka detyruar të rekrutojnë punonjës sezonalë, kryesisht nga vendet aziatike.
Klan News
