Reali i Madridit është vënë në kërkim të trajnerit të Juventusit, Masimiljano Alegri. Pas rezultateve të dobëta në kampionat, Reali kërkon të kënaqë tifozët me blerjen e një trajneri të suksesshëm dhe kur flitet për merkato, “madrilenët arrijnë pothuajse gjithmonë atë që dëshirojnë”.
Fillimisht, lajmi është publikuar në të përditshmet italiane të cilët kanë zbuluar edhe ofertën e Florentino Perez ndaj teknikut të Juventusit.
Bëhet fjalë për 7 milionë euro në vit, plus bonuset për rezultatet e arritura. Kjo kërkesë ka shkaktuar panik tek bardhezinjtë të cilët ndodhen në prag të rinovimit të kontratës me Alegrin.
Aktualisht, presidenti Anjeli i ofron atij 4.9 milionë euro në vit, por kjo shifër duket shumë larg ofertës madrilene.
Pas Murinjos te Mançesteri dhe Kontes te Çelsi në fund të sezonit, nuk përjashtohet mundësia që edhe tekniku italian të kalojë në ligën spanjolle.
