TIRANE- Është zgjedhur 3 herë radhazi kryetar i Bashkisë së Elbasanit, nën siglën e Partisë Socialiste dhe Qazim Sejdini njihet si një nga miqtë e kryetarit Edi Rama.
Është përfolur disa herë në media, siç ishte edhe rasti i videos ku kërcënonte gazetarët para zgjedhjeve të mos flasin e të mos shkruajnë kundër tij.
Sot portali boldnews ka zbardhur pasurinë e tij dhe të shumë kryebashkiakëve të tjerë që janë kthyer në padronë të qyteteve, pasi janë zgjedhur për disa vite radhazi dhe janë kamur, mbase edhe në mënyrë të paligjshme….
Duke iu referuar rastit të Qazim Sejdinit, përmes deklaratës së tij të pasurisë që u publikua fillimisht nga boldnews mësojmë se ai disponon një pasuri të majme kryesisht në Jug të vendit.
“Asetet e tij ndodhen në jug të vendit dhe kryesisht në Fier. Në këtë qytet Sejdini ka një vilë me sipërfaqe 478 m2 dhe me vlerë 350 milion lekë (të vjetra), një banesë prej 120 m2 me vlerë 100 milion lekë (të vjetra), një magazinë prej 840 m2 me vlerë 250 milion lekë (të vjetra) si dhe dy zyra të mëdha me një vlerë totali prej 86 milion lekësh (të vjetra)”, thuhet në artikull.
Në Vlorë ka një banesë 130 m2 me vlerë 63 milion lekë (të vjetra), dhe një tjetër me sipërfaqe 102 m2. Sejdini ka 3 makina në pronësi që shkojnë rreth 50 milion lekë (të vjetra).
Por përveç pronave, kryebashkiaku i Elbasanit ka edhe shumë borxhe pasi ka marrë nga bankat e nivelit të dytë rreth 270 milion lekë kredi.
Bashkëshortja e Qzim Sejdinit nëpërmjet “Ujori Sh.p.k”, një agjensi doganore në emër të saj, ka përfituar qindra miliona lekë që prej vitit 2004. Gjithashtu edhe fëmijët e kryebashkiakut Sejdini kanë arritur të punësohen në institucione shtetërore me paga relativisht të larta dhe të merren gjithashtu me aktivitete private.
Viti elektoral 2013, për familjen Sejdinin do të ishte i artë kjo dhe për shkak të një ngërçi institucional të Inspektoriatit të Deklarimit dhe Kontrollit të Parurive. Në këtë vit, bashkëshortja e Sejdinit deklaron se ka fituar plot 200 milion lekë nga kompania “Ujori Sh.p.k” , ndërkohë që një vit më parë, në 2012, nuk i kalonte 4.7 milion lekë të ardhura (të vjetra).
Po në 2013, të ardhurat për fëmijët e kryebashkiakut u rritën në 31 milion lekë ndërsa u shtohen edhe një apartament në Vlorë me sipërfaqe 102 m2. Gjithashtu familjes Sejdini shtoi listën e aseteve edhe me një ndërtesë me sip. 831 m2 por nuk specifikohet vlera si dhe vendndodhja.
Marrë nga boldnews.al
