Ministri i Jashtëm i Kosovës, Behgjet Pacolli, ka deklaruar se ka shpallur person të padëshiruar në Republikën e Kosovës, Kryeministren serbe Ana Bërnabiç.
Ky vendim ka ardhur fill pas deklaratave që kjo e fundit ka bërë për qytetarët kosovarë gjatë prezantimit të progres raportit të Komisionit Europian për Serbinë. Bërnabiç deklaroi se “kemi punë me njerëz që shprehimisht kanë dalë nga mali”.
Kjo deklaratë e Kryeministres serbe është cilësuar si racizëm dhe e papranueshme nga Pacolli dhe ai është zotuar që për sa kohë do të mbajë detyrën e Ministrit të Jashtëm, Bërnabiç nuk do të shkelë në Kosovë.
Postimi i plotë i Behgjet Pacollit
“I pështirë dhe krejtësisht të papranueshme komentet e Kryeministres serbe Ana Brnanic në prani të shefit të Delegacionit të BE-së në Serbi Sem Fabrizi ndaj Kosovës “që kemi të bëjmë me njerëzit që vijnë nga mali”.
Ky racizëm i institucionalizuar në Serbi, që ka brumin në ideologjinë ultranacionaliste të sëmurë që promovon Qeveria e Ana Brnabicit.
Shpresoj që Evropa sot të kuptojë se me çfarë lloj njerëzish kemi të bëjmë, me ata që kanë mbështetur vrasjet masive dhe mohojnë krimet e luftës të kryera nga Beogradi në ish-Jugosllavi.
E them me përgjegjësi që sa të jem unë ministër i jashtëm i Republikës së Kosovës, nuk do të lejojë që Kryeministrja serbe të hyjë në Kosovë, për sa kohë që ajo të ndjek një ideologji raciste dhe të sëmurë kundër popullit të Kosovës dhe ndërmjet etnive që jetojnë këtu.” /Opinion.al
