Ende pa u krijuar, qeveria i kërkon bashkëpunimin opozitës së re. Këtë e bëri këtë të hënë ministrja e Shtetit për Marrëdhënien me Parlamenti, Elisa Spiropali. Zonja Spiropali kërkoi që opozita e rë të diskutojë me qeverinë draftin e reformës zgjedhore, e cila përfshin edhe votën e emigrantëve.
“Për fat të keq, bllokimi i Kuvendit nga opozita e ka bërë të pamundur debatimin e kësaj teme me rëndësi kombëtare, ndaj gjejmë rastin që t’i bëjmë thirrje e njëkohësisht të theksojmë se mbetemi shpresëplotë që opozita të marrë seriozisht këtë çështje, duke e bërë pjesë të bisedimeve të reformës së ardhshme zgjedhore. Bashkëpunimi i opozitës së re në Kuvend do të nevojitet edhe për kalimin e ndryshimeve në vetëqeverisjen vendore, një ligj që kërkon 3/5 për të bërë realitet krijimin e një zyre speciale, të dedikuar për diasporën në çdo njësi administrative”, tha Spiropali.
Në të njëjtën linjë ishte dhe numri dy i Partisë Socialiste, Taulant Balla. Ky i fundit nga një studio televizive tha se vendet e lëna bosh nga opozita në Kuvend do të plotësohen dhe shembullin e dhanë sot 4 deputetë nga radhët e LSI-së që pranuan mandatin.
“Procesi i mbushjes së Kuvendit me deputetë do vijojë. Se vetëm në Tiranë ka pasur 50 kandidatë PD. Kjo është një krizë brenda tyre, e shpikën këtë krizë me një mekanizëm që dihet ku do t’i çonte”, tha Balla.
Por kryedemokrati Lulzim Basha kur u pyet për betimin e deputetëve të rinj, proces që do zhvillohet në seancën e së martës tha se opozita nuk njeh asnjë vendim të një Parlamenti ilegjitim./ Opinion.al
