Presidentja e Kosovës, Vjosa Osmani, ka kujtuar 1-vjetorin e rënies së dëshmorit, rreshterit Afrim Bunjaku.
Përmes një reagimi në rrjete sociale, ajo thotë se Afrim Bunjaku ra dëshmor për të treguar se Kosova është e pandashme dhe kufijtë e saj janë të paprekshëm.
“Sot një vit, Rreshteri Afrim Bunjaku ra dëshmor, për të treguar edhe një herë, siç kemi dëshmuar ndër shekuj, se kjo tokë është atdheu ynë i përjetshëm. Se liria nuk ka çmim. Se Kosova është dhe do të mbetet e pandashme, e liria dhe kufijtë tanë të paprekshëm! Sot e përgjithmonë”, ka shkruar Osmani.
Kujtojmë se rreshteri 50-vjeçar nga Vushtrria, Afrim Bunjaku mbeti i vrarë në sulmin e Banjskës që ndodhi më 24 shtator të vitit të kaluar.
