Presidenti i Serbisë, Aleksandër Vuçiç është pyetur nga Euronews Serbia, lidhur me deklaratën së Presidentes së Kosovës, Vjosa Osmani, e cila ka kërkuar që Bashkimi Evropian të vendosë sanksione ndaj Serbisë, pas sulmit të 24 shtatorit në Banjskë të Zveçanit.
Vuçiç u shpreh se nuk është gjë e mençur që të shantazhohet Bashkimi Evropian, për të vendosur sanksione.
“Ka shumë dallime mes nesh, njëra prej tyre është se unë kurrë nuk kam kërkuar sanksione ndaj askujt, besoj se nuk është e drejtë, nuk është e mençur politikisht, sidomos të mos shantazhosh BE-në për të bërë diçka që dëshiron. Unë kurrë nuk do ta bëja këtë. Por, në çdo rast, i takon shteteve anëtare të vendosin”, tha presidenti serb.
Kujtojmë se në Samitin e Bashkësisë Politike Evropiane në Granada, ku po merr pjesë edhe Vuçiç, Osmani i bëri thirrje Spanjës që të marrë masa ndaj Serbisë dhe tha se nuk do të ketë bisedime me presidentin serb deri në miratimin e sanksioneve.
