Krerët e OSBE u ka bërë thirrje palëve politike në Shqipëri që të vetëpërmbahen dhe të respektojnë proceset demokratike të vendit. OSBE u kërkoi palëve politike që të sigurojnë që procesi zgjedhor i 30 qershorit të jetë paqësor.
“OSBE ka monitoruar nga afër ngjarjet dhe ka nxitur vazhdimisht të gjithë aktorët relevantë të angazhuar në politikë të respektojnë proceset demokratike të vendit dhe të tregojnë vetëpërmbajtje. Tani më shumë se kurrë është e domosdoshme që aktorët shqiptarë të punojnë së bashku për të zhbllokuar situatën aktuale, për t’u angazhuar në dialog pa kushte dhe për të siguruar që zhvillimi i zgjedhjeve të dielën të jetë paqësor. Ne i nxisim të gjitha palët e interesuara që të mbështesin sundimin e ligjit, të respektojnë rolet kushtetuese të institucioneve përkatëse demokratike dhe të drejtat themelore dhe të shmangin dhunën. Të dy, dhunuesit dhe nxitësit e akteve të dhunshme duhet të mbajnë përgjegjësi ligjore. Ne gjithashtu u bëjmë thirrje institucioneve të zbatimit të ligjit që të marrin masa paraprake“, theksohet në deklaratën e shpërndarë.
Policia e Shtetit ka arrestuar 14 persona si të dyshuar për sulmin ndaj KZAZ nr. 6, në qarkun Shkodër. 3 të tjerë janë proceduar në gjendje të lirë, ndërsa 9 persona janë shpallur në kërkim, ndër ta, funksionarë të bashkisë Vau Dejës apo të zgjedhur lokalë, si dhe Alfred hila, vëllai i kryetarit të Bashkisë së Vaut të Dejës, Zef Hila.
Zv.drejtoresha e Përgjithshme e Policisë së Shtetit, Aida Hajnaj, tha në një konferencë për shtyp se arrestimi i tyre u bë pasi një natë më parë, ata kanë protestuar duke përdorur sende të forta dhe bomba molotov në drejtim të KZAZ nr. 6, e cila ndodhet në ambientet e shkollës “Ndre Mjeda” në fshatin Bushat, por edhe në drejtim të punonjësve të Policisë që ishin të vendosur me shërbim./ Opinion.al
