Një 38-vjeçar italian nuk arriti t’i gëzohet mbijetesës së tij nga katastrofa e ortekut të enjten në Itali, pasi ende të bllokuar nën dëborë dhe rrënoja gjendet bashkëshortja dhe dy fëmijët e tij.
Autoritetet italiane thonë se rreth 30 persona rezultojnë të humbur, pasi një ortek goditi hotelin Rigopiano në Italinë qendrore, afër Peskarës.
“Jam gjallë sepse dola për të marrë diçka nga makina”, u tha mjekëve Giampiero Parete, raporton ANSA.
“Ra orteku dhe unë u ‘varrosa’ në dëborë, por ia arrita të dal që aty. Makina nuk u zu nga dëbora kështu qe prita aty që të vinin forcat e shpëtimit”, tha ai.
Parete ngriti alarmin për katastrofën në hotel nëpërmjet punonjësve të tij. Burri nga Montesilvano afër Peskarës është jashtë rrezikut për jetën, thonë mjekët.
Quintino Marcella, shok i të mbijetuarit u tha mediave se familja e Paretes ishte gati të linte hotelin dhe po qëndronin në lobin e ndenjes, kur orteku goditi hotelin.
Një person është nxjerrë i vdekur nga dëbora, ndërsa të paktën tre të tjerë ia dolën të shpëtojnë gjallë. Një zyrtar italian tha se “ka shumë viktima në hotel”.
Pamjet dramatike tregojnë se si hoteli 3-katësh u shemb pasi ishte zhvendosur për metra të tëra. Katër tërmete tronditën zonën ku ndodhet hoteli me lëkundjen që u ndjenë deri në 80 milje larg.
Media raporton se trashësia e dëborës në zonë kishte arritur mbi 4.5 metra, si pasojë e reshjeve të dendura ditëve të fundit.
