Ortek në rrugën e Thethit. Emergjenca Civile: Nuk kemi çfarë të bëjmë, rrini në fshat

Një ortek i rënë gjatë paradites së sotme në Qafën e Ftorës, në rrugën që lidh Shkodrën me Thethin ka mbajtur të bllokuar 2 automjete të cilat lëviznin nga Thethi në drejtim të qytetit. Sipas raportimeve të marra nga banorë të zonës, dy automjetet e bllokuara kanë qenë të banorëve të fshatit dhe jo turistë që lëviznin shpesh në këtë zonë. Udhëtarët kanë kërkuar ndihmën e Emergjencave Civile, por duke qenë një zonë e veshtirë, përgjigja që kanë marrë ka qenë negative, ndaj edhe automjetet janë kthyer sërish në drejtim të fshatit. Po kështu sipas raportimeve të marra në terren, reshjet e dëborës janë shfaqur në lartësitë e maleve ndërsa brenda në fshat situata duket në kontroll.