Prej 12 vitesh në opozitë, Partia Demokratike është angazhuar fort për zgjedhjet parlamentare të 11 Majit, duke prezantuar një program qeverisës prej disa pikash kryesore, por e fokusuar së tepërmi tek të rinjtë, familja dhe prodhimi vendas.
Në emisionin “Opinion” në Tv Klan, po diskutohet pikërisht për efikasitetin e Partisë Demokratike në këtë fushatë elektorale.
Ish-zëvendësministrja e Mjedisit dhe Turizmit, Ornela Çuçi, duke analizuar fushatën e bërë nga të dyja partitë kryesore, si ajo e demokratëve dhe ajo e socialistëve, sipas saj ka një përbashkët, që ngjajnë si fushata presidenciale. Ajo shprehet se në këtë fushatë, fillimisht vjen lideri, e nga pas partia.
Lidhur me programin e Partisë Demokratike, Çuçi shprehet se është relativisht i mirë, por kandidatët e listave të mbyllura nuk duken asgjekundi, ndërsa ata të listës së hapur “rendin të lirë”.
Duke e krahasuar me Partinë Socialiste, kjo e fundit sipas ish-zëvendësministres është më e mirë në organizimin e forcës politike sesa Partia Demokratike, e se që në shtator është organizuar derë më derë tek qytetarët.
Ornela Çuçi: Në të dyja kampet ngjan si fushatë presidenciale, jam unë e vjen prapa partia. Më parë po të shikoni programin e PD, është relativisht më i mirë që kemi parë, e të kujton atë të vitit 2005. Janë të njëjta figura që Berisha kandidon për mandat të katërt, edhe Rama kandidon për mandat të të katërt. Ju thatë për listat e mbyllura, ata nuk janë askund, ndërsa të hapurat rendin të lira.
Belind Këlliçi: Ku i shihni që janë në rend të lirë? Se po të hapim rrjetet e tyre sociale, i keni çdo ditë në takime, në terren. Ja ku na ke 3 kandidatë, kush nga ne nuk është aktiv?
Ornela Çuçi: Memet në fakt tregojnë se të dyja listat kanë rend të lirë, për të bërë tellall është rënia e lirë. Ndryshimi mes tyre është se PS është tallaviste, por nga ana tjeter, që në shtator të vitit të kaluar strukturat e PS janë organizuar derë më derë.
Belind Këlliçi: Derë më derë për tallava?
Ornela Çuçi: A ka kënge valle? Po ka. Por në organizimin e partisë po punon në mënyrë të shkëlqyer, e pse në pushtet, ndërkohë ju duhej të ishit organizuar kohë më parë.
